مفتتح
حاجتين بخاف منّهم
وبيخلونى اعيط
دلع الكمانجة ف الصبا والكرد
وسورة الواقعة م الشيخ “محمد رفعت”
القصيدة
ممكن تحاولوا تسّندونى يمكن اعرف اقوم
أنا أصلى من سنتين كده
ومفيش إيدين اتبرعت
تنجدنى م الورطة
غاوى أمور المعيلة من صغرى
بشكل مش معقول
روحى ..
بسلمها ف ثوانى للى يضحكلى
وبسيبنى ع الآخر..
لآخر شمعدان قايد ف روحه
وبعدها علطول ……………
مش عايز افتكر الوجع
بس الوجع ذاكرته وحشية
قادر يجيبنى لو حتى تحت الأرض ..
ف زيارة لواحد م الملوك السبعة
وطنى ..
ماهوش ع الأرض دى
أنا وطنى أرض غريبة ماتطولهاش قدم
واحد برىء منكم
برّاحة على ضلى
شايفينه متعوّر وبرضه بتلطوه
يعنى عاجبكم صوت صريخه
وهوّه سارح ف النشاز
أنا بعشق المزيكا والله
فحرام عليكوا تشمتوها ف اللى جايبنّى
“رابح بدير” دايس على دماغى
وفاتحلى ضهرى لتريقة عفاريتى على خيبتى
وانا..
بسذاجتى وبعبطى العفيف
سلمته صك محبتى
وتوحدى مع ذاته اللى ما بتشبعش موت
هوّه و”أيمن عبد الرسول” واحد
وبرؤيتى العانس
أنا شفتهم ضدين
(ياه ع الغبا)
ده “حسام حسين” شايفه هناااااااك
واقف وبيقولها مابين نفسه وبينه
وكأنه مش عايز يقول
إنه بيوصفنى
من “أشرف الشافعى” بتبتدى المأساة
عشرين جنيه بصتلى من جيبه
و”اسكندرية”..
من ساعتها بتتلوى
لو يوم شافتنا واحنا مش مع بعض
وف أول بلوزة حريمى بتتعتر فينا
سابنى ومشى
ما اعرفش ليه ؟
يعنى اشتكيه للأوليا
ولاّ اقرا حزب النصر على ضله وخلاص
يااااااااااااااااااااااااه
أنا عندى رغبة ف العياط فعلا
فياريتكوا تيجوا شوية على نفسكم
وتطبطبوا عليّه